રિતિક રોશન, દીપિકા પાદુકોણ અને અનિલ કપૂરની આગામી ફિલ્મના ‘ફાઈટર’નું પ્રમોશન પૂર જોશમાં ચાલી રહ્યું છે. ફિલ્મના લીડ સ્ટાર્સની સાથે હવે વિલને પણ ઓડિયન્સમાં ઉત્સુકતા ઊભી કરી છે. એક્ટર તરીકે પહેલી ફિલ્મ હોવા છતાં વિલન ઋષભ સાહનીની પ્રશંસા થઈ રહી છે. ફિલ્મના ટ્રેલરમાં રિતિક અને ઋષભને એકબીજા સાથે લડતાં દર્શાવાયા છે.
‘ફાઈટર’ના ટ્રેલરમાં રિતિક અને ઋષભની લડાઈ જોઈ ઓડિયન્સને સમજાઈ ગયું કે આ ફિલ્મમાં નવા વિલનની એન્ટ્રી થઈ છે.
દેશની પહેલી એરિયલ એક્શન ફિલ્મ ગણાતી ‘ફાઈટર’માં 28 વર્ષના ઋષભ સાહનીએ ત્રણ દાયકાની કરિયર ધરાવતા રિતિક રોશનને જોરદાર ટક્કર આપી છે. મશીન ગન ચલાવવાના સીન અને એક્શન સીક્વન્સમાં ઋષભને ઓડિયન્સે ખૂબ પસંદ કર્યા છે. એક્ટિંગની શરૂઆત કરતા પહેલા ઋષભે મોડેલિંગ કરેલું છે. ઈન્સ્ટાગ્રામ પર તેના 12 હજારથી વધુ ફોલોઅર્સ છે. નિખિલ અડવાણીની વેબ સિરીઝ ધ એમ્પાયરથી ઋષભે એક્ટિંગની શરૂઆત કરી હતી. તેમાં બાબરના ભાઈ મહેમૂદનો રોલ કર્યો હતો. અન્ય બે વેબ સિરીઝ કૌન બનેગી શિખરવટી અને બેસ્ટસેલરની ક્રૂમાં ઋષભે કામ કર્યુ હતું.
ઋષભને પહેલી ફિલ્મ મળી છે અને તે પણ રિતિક-દીપિકા સાથે છે. પહેલી ફિલ્મમાં આટલો મહત્ત્વનો રોલ મળ્યો હોવાની જાણ થતાં ઋષભના ફોલોઅર્સ સતત વધી રહ્યા છે. અત્યારે તેના 12 હજાર ફોલોઅર્સ છે, પરંતુ ફાઈટરની રિલીઝ બાદ તેની સંખ્યા અનેક ગણી વધી શકે છે. સિદ્ધાર્થ આનંદના ડાયરેક્શનમાં બનેલી આ ફિલ્મ 25 જાન્યુઆરીએ રિલીઝ થઈ રહી છે.